A deputada do BNG. Ariadna Fernández, esixe á Xunta que garanta o benestar nos centros residenciais de menores ante un sistema que está “sobresaturado”, xa que se atopa ao 108% da súa capacidade, segundo informou o propio Goberno galego ante a repartición de menores migrantes.

Desde o BNG, piden que se revisen os cocientes e os perfís das persoas que atenden os centros e residencias en horario nocturno para facilitar unha correcta atención e reclaman que os equipos técnicos do menor non sufran unha rotación de persoal constante.

 Fernández considera que o sistema de protección galego está nunha “situación lamentable”, segundo informou o BNG, dado que a propia Consellería de Política Social recoñece que se atopa ao 108% da súa capacidade, polo que está “sobresaturado”.

A deputada nacionalista lembra que nestes centros, a maiores do aloxamento, débese prestar apoio educativo e psicosocial, seguimento escolar ou formación en habilidades sociais básicas, sempre que sexa posible, coa colaboración, apoio e orientación das súas respectivas familias.

Pero asegura que, en realidade, os cocientes de persoal “insostibles” e os continuos cambios debido “ás condicións laborais precarias” reverten nunha atención aos menores “claramente mermada”, coa imposibilidade de crear vínculos e relacións de apego cos educadores. 

Por iso, reclama unha avaliación exhaustiva e completa da totalidade do sistema de protección e un aumento dos orzamentos, á parte de modificar o Decreto 329/2005 do 28 de xullo, que regula os centros de menores e de atención á infancia, xa que está “totalmente obsoleto”. 

O BNG lembra que, segundo o Ministerio de Mocidade, os menores institucionalizados en Galicia superan os 700 e é a cuarta comunidade con máis menores esperando por unha familia acolledora.